Studio Ghibli အကြောင်း မိတ်ဆက်

Studio Ghibli လို့ ဆိုလိုက်ရင် ကာတွန်းချစ်ပရိတ်သတ်များသာမက ရံဖန်ရံခါမှ ကာတွန်းကားကြည့်မိသူ ရုပ်ရှင်ပရိတ်သတ်များကပါ ဂျပန်ပြည်ရဲ့ နံပါတ်တစ်၊ ကမ္ဘာ့ ကာတွန်းရုပ်ရှင်လောကအပေါ်မှာလည်း သြဇာကြီးတဲ့ ကာတွန်းစတူဒီယိုလို့ သိမှတ်ထားကြမှာသေချာပါတယ်။ တိုကျိုမြို့ အခြေစိုက်တဲ့ ဒီကာတွန်းစတူဒီယိုကြီးကို ၁၉၈၅ ခုနှစ်မှာ စတင်တည်ထောင်ခဲ့တာဖြစ်ပြီး ကုမ္ပဏီရဲ့ အမှတ်တံဆိပ်အဖြစ်  ၁၉၈၈ခုနှစ်မှာ သူတို့ ရိုက်ကူးထုတ်လုပ်ခဲ့ပြီး ပရိတ်သတ်များအရမ်းအားပေးခဲ့တဲ့  "အိမ်နီးနားချင်း တိုတိုရို (My Neighbor Totoro)" ဇာတ်ကားမှ ဇာတ်ကောင် Totoro ပုံကို အသုံးပြုထားပါတယ်။ ကမ္ဘာ့ Anime ပရိတ်သတ်များက Studio Ghibli ကို အာရှရဲ့ Disney ကုမ္ပဏီ၊ တည်ထောင်သူ ဒါရိုက်တာ မီယာဇာကီကို အာရှရဲ့ ဝေါ့လ်ဒစ်စနေ အဖြစ် တင်စားဂုဏ်ပြုကြပါတယ်။ ( ကျနော်ကတော့ မီယာဇာကီကို ဝေါ့လ်ဒစ်စနေးထက်ပိုကြိုက်ပါတယ်။ )


ဆယ်စုနှစ်သုံးခုကျော် သက်တမ်းရလာပြီဖြစ်တဲ့ စတူဒီယိုဟာ သူတို့ ထုတ်လုပ်ရိုက်ကူးခဲ့တဲ့ ဇာတ်ကားများနဲ့ ဆုတော်တော်များများကိုလည်း ဆွတ်ခူးနိုင်ခဲ့ပါတယ်။ ၂၀၀၂ ခုနှစ်မှာ ထုတ်လုပ်ခဲ့တဲ့ "လိပ်ပြာလွင့်ခြင်း ( Spirited Away )" ဇာတ်ကားဆိုရင် ရွှေဝက်ဝံဆုကို ရရှိရုံသာမက အကောင်းဆုံး ကာတွန်းရုပ်ရှင်ဆု အော်စကာကိုပါ ဆွတ်ခူးနိုင်ခဲ့ပါတယ်။

Ghibli ရဲ့ အဓိပ္ပါယ်


Ghibli ဆိုတဲ့စကားလုံးဟာ မူရင်း အာရပ်ဘာသာစကား sirocco ဖြစ်ပြီး Mediterranean Wind လို့ အဓိပ္ပါယ်ရပါတယ်။ ဒုတိယကမ္ဘာစစ်ကာလက အီတလီတွေဟာ သူတို့ရဲ့ ဆာဟာရဒေသ ကင်းထောက်လေယာဉ်တွေကို sirocco လို့ သုံးနှုန်းခဲ့ပါတယ်။ အာရပ်ဘာသာစကားမှာရော အီတလီမှာပါ သံပြင်း G သံနဲ့ ထွက်ပေမယ့် စတူဒီယိုရဲ့ နာမည်ကတော့ ဂျပန်သံသံပျော့ G သံ ( ji-bu-ri ) နဲ့ ထွက်ပါတယ်။


ဂျပန်ကာတွန်းရုပ်ရှင်လောကမှာ ပြုပြင်ပြောင်းလဲမှုများနှင့် အတူ သစ်လွင်လတ်ဆတ်သော လေလှိုင်း တိုက်ခတ်ပစ်မယ်ဆိုတဲ့ စိတ်ကူးနဲ့ စတူဒီယိုတည်ထောင်သူများက ဒီနာမည်ကိုရွေးချယ် မှည့်ခေါ်ခဲ့ခြင်းဖြစ်ပါတယ်။

မှတ်တမ်းများ


- စတူဒီယိုက ထုတ်သမျှကားတွေထဲမှာ ပထမဆုံး ၀င်ငွေအများဆုံးရတဲ့ကားကတော့ ၁၉၈၉ မှာ ထုတ်လုပ်တဲ့ "ကိကီလေးရဲ့ အိမ်အရောက်ပို့ဝန်ဆောင်မှု ( Ki Ki's Delivery Service )" ဇာတ်ကားဖြစ်ပြီး စတူဒီယိုက စတင်ထုတ်လုပ်ခဲ့ပြီး လေးနှစ်အကြာမှာမှ Box-Office စာရင်းမှာ မှတ်တမ်းဝင် ၀င်ငွေဒေါ်လာ ၁၈ သန်းကျော်ရရှိခဲ့တာပါ။


- စတူဒီယိုအနေနဲ့ ကွန်ပျူတာဂရပ်ဖစ်ကို အသုံးပြုပြီး ပထမဆုံးရိုက်ကူးခဲ့တဲ့ကားကတော့ ၁၉၉၂ မှာ ထုတ်ခဲ့တဲ့ " ခွေးတူဝံတူတို့ရဲ့ တိုက်ပွဲ (Pom Poko)" ဇာတ်ကားပဲဖြစ်ပါတယ်။


- စတူဒီယိုတည်ထောင်သူ ဒါရိုက်တာ မီယာဇာကီ ကွန်ပျူတာဂရပ်ဖစ်ကို ပထမဆုံးအသုံးပြုခဲ့တဲ့ကား၊ ဒစ်ဂျစ်တယ်အရောင်ဖြည့်နည်းကို ပထမဆုံးအသုံးပြုခဲ့တဲ့ကားကတော့ ၁၉၉၇ မှာ ထုတ်လုပ်ခဲ့တဲ့ "မင်းသမီးလေး မိုနိုကီကီ( Princess Monokeke) " ဖြစ်ပြီး တိုက်တန်းနစ်ဇာတ်ကားမထွက်မှီထိ အီးတီကားကိုကျော်ဖြတ်ကာ ဂျပန်ပြည်တွင်းမှာ ၀င်ငွေအများဆုံးရယူနိုင်ခဲ့ပါတယ်။


- ဇာတ်ကားအစမှ အဆုံး ဒစ်ဂျစ်တယ်နည်းပညာများကိုသာ အသုံးပြုခဲ့တဲ့ ပထမဆုံးဇာတ်ကားကတော့ ၁၉၉၉ မှာ ထုတ်လုပ်ခဲ့တဲ့ " ယာမာဒါ မိသားစု (My Neighbors the Yamadas)" ဆိုတဲ့ ဇာတ်ကားဘဲဖြစ်ပါတယ်။


- စတူဒီယိုရဲ့ ၀င်ငွေ အများဆုံးစံချိန်တင်ကားကတော့ ၂၀၀၂ မှာ ထုတ်လုပ်ခဲ့တဲ့ " လိပ်ပြာလွင့်ခြင်း( Spirited Away )" ဇာတ်ကားဖြစ်ပြီး ကမ္ဘာအနှံ့ပြသမှုကနေ ၀င်ငွေ ဒေါ်လာ ၂၇၅ သန်းလောက် ရရှိခဲ့ပါတယ်။ ဂျပန်ပြည်တွင်းမှာ ၀င်ငွေအကောင်းဆုံး ကာတွန်းရုပ်ရှင်အဖြစ် အခုချိန်ထိ ရပ်တည်နိုင်ခဲ့ပြီး အမေရိကန်ပြင်ပက ထုတ်လုပ်တဲ့ ကာတွန်းကားများထဲမှာ ပထမဆုံး အော်စကာဆုကို ဆွတ်ခူးနိုင်ခဲ့ပါတယ်။

ကိုယ်ပိုင်ပြတိုက်

Studio Ghibli မှာ ကိုယ်ပိုင်ပြတိုက်တစ်ခု ရှိတာ သင်သိပါသလား။ မသိသေးရင်ဖြင့် ပြောပြပါမယ်။ မြို့တော် တိုကျိုရဲ့ မိတာကာ အရပ်မှာ ရှိပါတယ်။ ဘာတွေရှိလည်း ဆိုတာတော့ ကျနော်လည်း ကိုယ်တိုင်မရောက်ဖူးသေးတော့ မသိပါဘူး။


Studio Ghibli ရဲ့ ထူးခြားချက်များ


သူတို့ ထုတ်လုပ်ခဲ့တဲ့ ဇာတ်ကားတော်တော်များများမှာ အဓိက ဇာတ်ဆောင်နေရာဟာ အသက်ငယ်ရွယ်တဲ့ ဆယ်ကျော်သက် မိန်းကလေးတွေအများစုဖြစ်တယ်။ စကားပြောတတ်တဲ့ ကြောင်တွေ၊ သဘောကောင်းပြီး ချစ်ဖို့ကောင်းတဲ့ အဖွားကြီးတွေ၊ လေကြောင်းသိပ္ပံ၊ မီးရထားတွေနဲ့ အခြားစိတ်ကူးယဉ်ဆန်တဲ့ သိပ္ပံပညာတွေ၊ ဂျပန့်ရိုးရာအစဉ်အလာ နဲ့ ယဉ်ကျေးမှုတွေ၊ လူ့အဖွဲ့အစည်းအပေါ်မြင်တဲ့ ဂျပန်တို့ ရဲ့ တမူထူးခြားတဲ့ အမြင်တွေ၊ ပုံသဏ္ဍာန်အမျိုးမျိုးပြောင်းလဲနိုင်တဲ့ ဇာတ်ကောင်တွေ၊ ငှက်အုပ်တွေ၊ ငှက်နဲ့ တူတဲ့အကောင်တွေ၊ အမြဲလိုလို အထင်လွဲခံရတဲ့ နေရာမှာ ရှိတတ်တဲ့ ယောက်ျားဇာတ်ဆောင်တွေ၊ လျို့ဝှက်နေရာတွေနဲ့ စိတ်ကူးယဉ်ဆန်တဲ့ သဘာဝဝန်းကျင်တွေဟာ စတူဒီယိုက ထုတ်လုပ်ခဲ့တဲ့ ဇာတ်ကားတွေရဲ့ တမူထူးခြားတဲ့ ၀ိသေသများဖြစ်ပါတယ်။


နောက်သိသင့်တဲ့ အချက်တစ်ချက်ကတော့ Studio Ghibli ရဲ့ ပထမဆုံး ဇာတ်ကားလို့ သတ်မှတ်ထားတဲ့ ၁၉၈၄ ထုတ် ဇာတ်ကား " လေရူးတောင်ကြားမှ နော်ဆီကာ( Nausicaa of the Valley of Wind )"  ဟာ Studio Ghibli ရဲ့ ဇာတ်ကားမဟုတ်ပါဘူး။ ဒီလိုဖတ်လိုက်ရလို့ အံသြမသွားပါနဲ့။ ဒီဇာတ်ကားကို ကိုယ်တိုက်ရေးညွှန်းရိုက်ကူးခဲ့တဲ့ ဒါရိုက်တာ မီယာဇာကီ Studio Ghibli ကို စတင်တည်ထောင်သူဖြစ်ပေမယ့် ဒီဇာတ်ကားဟာ Studio Ghibli ရယ်လို့ စတင်မတည်ထောင်မှီ တစ်နှစ်စောပြီး ထွက်ရှိခဲ့တာမို့ပါ။


နောက် သိသင့်တဲ့ အချက်တစ်ချက်ကတော့ Studio Ghibli ဟာ သူတို့ ရိုက်ကူးထုတ်လုပ်တဲ့ ဇာတ်ကားများကို ကမ္ဘာအနှံ့ ဖြန့်ချိရာမှာ ဒေသမှုပြုခြင်း၊ တည်းဖြတ်ခြင်းတို့ကို ခွင့်မပြုတာပါ။ ၁၉၉၇ မှာ ထုတ်လုပ်ခဲ့တဲ့ "မင်းသမီးလေး မိုနိုကီကီ( Princess Monokeke) " ဇာတ်ကားကို ကမ္ဘာကို ဖြန့်ချိပြသချိန်မှာ အမေရိကားက ဖြန့်ချိရေးကုမ္ပဏီ Miramax ဟာ ဂျပန်ကာတွန်းကားကို အမေရိကန်မှာ စျေးကွက်ဝင်လူကြိုက်များစေဖို့ သူတို့ စံနဲ့ သူတို့ တည်းဖြတ်ချင်ခဲ့တယ်။ ဒါကို Studio Ghibli ကတုံ့ပြန်ပုံကတော့ လှတယ်။ တည်းဖြတ်ခြင်းမပြုပါနှင့်ဆိုတဲ့ တိုတိုတုပ်တုပ်စာတစ်စောင်နဲ့ ဂျပန်ကင်တာနား ဓါးတစ်လက်ကို ပို့ပေးလိုက်တယ်။


ဇာတ်ကားအညွှန်းများ


ဒီ Blog မှာ ကျနော်ညွှန်းပေးခဲ့ဖူးတဲ့ ဇာတ်ကားအညွှန်းကို ဖတ်ချင်ရင်တော့

Ki Ki's Delivery Service 

မှာ သွားဖတ်နိုင်ပါတယ်။ နောက်နောင်လည်း Studio Ghibli မှ ထွက်ရှိထားသော ဇာတ်ကားများကို အညွှန်းရေးပေးပါဦးမယ်။ Studio Ghibli ဇာတ်ကားတွေဟာ စျေးကွက်မှာ နည်းနည်းရှားပါတယ်။ ရှာဝယ်ကြည့်လို့ အစုံမရရင် ကြည့်ချင်တဲ့ ဇာတ်ကားနာမည်ပြောပြီး ဆက်သွယ်ရမယ့် လိပ်စာနဲ့အတူ ကျနော့်ဆီ Message ပို့ပေးထားပါ။ 

My Favourite Comedians: Mike Myers

သင်္ကြန်တစ်တွင်းလုံးအောင်းပြီး ဇာတ်ကားတွေ တော်တော်များများကြည့်ဖြစ်ပေမယ့် အင်တာနက်နဲ့ဝေးတဲ့ နယ်မြို့လေးကို ပြန်ရောက်နေတာကြောင့် စာလည်း မရေးဖြစ်၊ မတင်ဖြစ်တာ ကြာပါပြီ။ တစ်ခါက ကျနော်ကြည့်ဖူးသမျှ ရုပ်ရှင်တွေထဲမှ ကျနော်ချစ်သော စက်ရုပ်များအကြောင်း စာတစ်ပုဒ် ရေးတင်ခဲ့ဖူးပါတယ်။ အဲ့ဒီမှာ Austin Powers ကားထဲက လူသတ်သမစက်ရုပ်လေးတွေအကြောင်းရေးရင်းနဲ့ Austin Powers ဇာတ်ကားတွေရဲ့ ဆရာကြီး Mike Myers အကြောင်းပြန်သတိရသွားတယ်။

 ဒီဘဲကြီးက ကျနော့်ငယ်ဘဝကို ပြန်တွေးရင် အမြဲအမှတ်ရနေမယ့် အခန်းတစ်နေရာကပါ၀င်နေတယ်။ ဒါနဲ့ဘဲ ကျနော်ကြည့်ဖူးသမျှထဲမှာ မှ ကျနော်အကြိုက်ဆုံးဟာသ သရုပ်ဆောင်တွေနဲ့ သူတို့ရဲ့ ဇာတ်ကားများအကြောင်း တင်ဆက်ရေးသားပေးဖို့ စိတ်ကူးရလာတာပဲ။ ပထမဆုံး အလှည့်ကျတဲ့ ဟာသဆရာကြီးကတော့ Mike Myers ဘဲပေါ့။ သူက ကျနော်ကလေးဘဝမှာ စသတိထားမိတဲ့ ဟာသ သရုပ်ဆောင်အနည်းစုထဲက တစ်ယောက်။


Mike Myers ဟာ ကျနော်တို့ မြန်မာပြည်က ပရိတ်သတ်များနဲ့ မစိမ်းလှတဲ့ သရုပ်ဆောင်ပါ။ သူရဲ့ Austin Powers ဇာတ်ကားသုံးကားလုံးဟာ ကမ္ဘာမှာ ၀က်ဝက်ကွဲအောင်မြင်ခဲ့သလိုဘဲ ကျနော်တို့ဆီမှလည်း တသောသော အားပေးခဲ့ကြပါတယ်။ ဒါ့အပြင် နောက်ပိုင်း Sherk  ဆိုတဲ့ အစိမ်းရောင်ဘီလူးကြီးပါတဲ့ကာတွန်းကား လေးကားလုံးမှာလည်း Mike က အသံသရုပ်ဆောင်ပေးထားတယ်။ ပြီးတော့ ၂၀၀၃ မှာ ရိုက်တဲ့ The Cat in the Hat မှာလည်း အသံသရုပ်ဆောင်ထားတယ်။

Austin Powers ဇာတ်ကားသုံးကားလုံးဟာ Austin Powers ဆိုတဲ့ မဟာသူလျှိုကြီးနဲ့ Dr.Evil ဆိုတဲ့ ကမ္ဘာ့ထိပ်ခေါင်လူဆိုးကြီးတို့ကြားက ဉာဏ်ရည်ပြိုင်ပွဲဘဲဖြစ်ပါတယ်။ Austin Powers အဖြစ်ကော Dr.Evil အဖြစ်ကော Mike ကိုယ်တိုင် နှစ်ကိုယ်ခွဲပြီး သရုပ်ဆောင်ထားတာဖြစ်ပါတယ်။


ပထမဆုံး Austin Powers ကားကတော့ ၁၉၉၇ မှာ ပြသခဲ့တဲ့ Austin Powers: International Man of Mystery ဇာတ်ကားဘဲဖြစ်ပါတယ်။ ဒုတိယကားကတော့ ၁၉၉၉ မှာ ပြသခဲ့တဲ့ Austin Powers: The Spy Who Shagged Me ဖြစ်ပြီး နောက်ဆုံး  AP ကားကတော့ ၂၀၀၂ မှာ ပြသခဲ့တဲ့ Austin Powers in Goldmember ဖြစ်ပါတယ်။


Mike ဟာ သရုပ်ဆောင်ပိုင်းတင်မဟုတ်ဘဲ ဟာသပညာမှာလည်း တော်တဲ့ ပညာရှင်တစ်ယောက်ဖြစ်ပါတယ်။ ကျနော်ပုံမှန်ကြည့်လေ့ရှိတဲ့ Comedy Central ဆိုတဲ့ Channel မှာ Saturday Night Live ဆိုတဲ့ အစီအစဉ်တစ်ခုရှိပါတယ်။ SNL ဟာ ဟာသပညာရှင်တွေကြားမှာတော့ သတ်ကွင်းတစ်ခုလိုပါဘဲ။ ထင်ပေါ်မှ စင်တော်ကကောက်ခံရတာဆိုသလို ဒိတ်ဒိတ်ကျဲ ဟာသပညာရှင်တွေ ပညာပြတဲ့နေရာဖြစ်ပါတယ်။ Mike ဟာ အဲ့ဒီအစီအစဉ်တွေမှာ ပရိသတ်တွေကို ပျော်တော်ဆက်ရုပ်တင်မက တခြား ရုပ်သံအစီအစဉ်တွေနဲ့ ကြည့်ချင်ပွဲတွေမှာပါ သရော်တော်တော်ပျော်တော်ဆက်နေဆဲဖြစ်ပါတယ်။ နိဂုံးချုပ်အနေနဲ့ ပြောရရင်တော့ ဟာသပညာရှင်များ၊ လူရွှင်တော်များ၊ ဟာသသရုပ်ဆောင်များကို စစ်တမ်းကောက်ယူရွေးချယ်ပေးအပ်တဲ့ The Comedians' Comedian ဆုကို Mike Myers ဟာ ၂၀၀၅ ခုနှစ်မှာ ဆွတ်ခူးခဲ့ဖူးပါတယ်လို့။

ကျနော်ချစ်သော စက်ရုပ်များ

ပြီးခဲ့တဲ့ရက်က Robot and Frank ကိုကြည့်ပြီး သဘောကျတာနဲ့ တန်းရေးပြီးတင်ပေးလိုက်တယ်။ အဲ့ဒီဇာတ်ကားကြည့်ပြီး ကျနော်ကြည့်ခဲ့ဖူးတဲ့၊ ကျနော်အမှတ်ရနေတဲ့ ရုပ်ရှင်ထဲက စက်ရုပ်တွေအကြောင်း ပြန်တွေးမိသွားတာနဲ့ ကျနော်ကြည့်ခဲ့သမျှထဲမှာမှ အမှတ်အရဆုံး၊ အချစ်ဆုံး ရုပ်ရှင်ထဲမှ စက်ရုပ်တွေအကြောင်း တင်ပြပေးလိုက်ပါတယ်။


၁။ ပထမဆုံးမှတ်ဉာဏ်ထဲမှာ စပြီးမှတ်မိတဲ့ စက်ရုပ်ကတော့ 1977 ကထွက်ရှိခဲ့တဲ့ Star Wars ကားထဲက စက်ရုပ်နှစ်ရုပ်ပဲဖြစ်ပါတယ်။ သူတို့ရဲ့သခင်တွေကို အင်မတန်သစ္စာရှိလှတဲ့၊ သူတို့သခင်တွေနဲ့ ကွဲကွာခဲ့ရတဲ့ ဒီစက်ရုပ်နှစ်ရုပ်ကိုတော့ Star Wars ကြည့်ဖူးတဲ့ ပရိသတ်တိုင်း အမှတ်ရနေမှာပါ။ သူတို့ကတော့ R2-D2 နဲ့ C-3PO တို့ပဲဖြစ်ပါတယ်။

 

 

၂။ နောက် စက်ရုပ်ရဲ။ ကလေးဘဝက အသေကြိုက်တဲ့ ဇာတ်ကားပေါ့ဗျာ။ Detroit က နယ်မြေရဲတစ်ယောက် မတော်တဆမှုနဲ့ သေသွားတဲ့အခါမှာ သူ့ကို မှုခင်းစုံထောက်နှိမ်နှင်းရေး စက်ရုပ်အဖြစ် ပြန်လည်တီထွင် အသက်သွင်းလိုက်တဲ့အကြောင်းပေါ့။၁၉၈၇ မှာ ထွက်တဲ့ကား။

  

၃။  အရည်ပျော် သံမဏိစက်ရုပ်ကားတွေနဲ့ အာနိုးကြီးကို အသေကြွေနေတဲ့အချိန် ၁၉၉၀ တုန်းက ထွက်ခဲ့တဲ့ Total Recall ကားထဲက စက်ရုပ်တွေကို သဘောကျမိသေးတယ်။ အဲ့ဒီကားထဲမှာ တက္ကစီဒါရိုင်ဘာတွေနေရာမှာ လူတွေက ကားမမောင်းဘဲ Johnny Cabs ဆိုတဲ့ စက်ရုပ်တွေကမောင်းတာ။ အာနိုးကြီးက စိတ်မရှည်လို့ တစ်ကောင်ကို ဖျက်ပစ်လိုက်သေးတယ်။

 

  

၄။ အော်စတင်ပါ၀ါကားတွေက ဘယ်ကတည်းကထွက်မှန်းတော့မသိဘူး။ နည်းနည်းကြီးလာမှ ကြည့်ရတာ။ သူက Adult ခန်းတွေပါတတ်တာကိုး။ အဲ့ဒီတုန်းက ဘီယွန့်စေးလ်ဆိုတာ မည်းမည်းတုံးတုံးလေးနဲ့ ၀င်သရုပ်ဆောင်ထားသေး။ သူတို့ရဲ့ ရင်အုံကနေ စက်သေနတ်တွေထုတ်ပြီး ပစ်တဲ့ စက်ရုပ်တွေလေ။

 

၅။  ၂၀၀၄ မှာထွက်တဲ့ ကျနော့်အသည်းကျော်လူမည်းမင်းသား Will Smith ရဲ့ကား။ Will Smith က စက်ရုပ်တွေကို မုန်းတီးတဲ့ စုံထောက်။ သူ့ရဲ့ တီထွင်သူကို သတ်တဲ့အမှုနဲ့ စက်ရုပ်တစ်ရုပ်ကို စုံစမ်းရတဲ့ ဇာတ်လမ်း။

 

၆။ ၂၀၀၇ မှာထွက်လာတဲ့ Transformer ကားကလည်း ကားတွေ၊ တခြားယာဉ်တွေအဖြစ်ပြောင်းလည်းနိုင်တဲ့ ဂြိုဟ်သားစက်ရုပ်တွေအကြောင်း ရိုက်ထားတာ အင်မတန်မိုက်ကိုး။ Autobot လူကောင်းစက်ရုပ်တွေနဲ့ လူဆိုး Decepticon တွေ တိုက်ကြတာ။ 

 

၇။  ၂၀၀၈ ခုနှစ်၊ Disney အောက်ကနေ ကျနော့်အသည်းကျော် Pixar ကထုတ်တဲ့ ကာတွန်းကားထဲက စက်ရုပ်လေးတွေ။ ပါသမျှ စက်ရုပ်တွေအကုန်သဘောကျပါရဲ့။ သဘောအကျဆုံးကတော့ အမှိုက်ကျုံးစက်ရုပ်လေး Wall-E ပေါ့ဗျာ။

 

၈။ ၂၀၁၁ မှာ ထွက်တဲ့ကား။ ငယ်တုန်းကကြည့်ဖူးတဲ့ စတားလုံးရဲ့ Rocky ကားကို အနာဂတဝါဒီပုံစံပြန်ရိုက်ထားသလိုဘဲ။ Hugh Jackman က စက်ရုပ်ကို လက်ဝှေ့သင်ပေးတဲ့ဆရာအဖြစ် သရုပ်ဆောင်တယ်။ 

 ၉။ ဒါကတော့ တလောလေးမှ ကြည့်ပြီး ကြိုက်သွားတဲ့ကား။ ၂၀၁၃ ထွက်။ Frank ဆိုတဲ့ အငြိမး်စား ဖောက်ထွင်းသူခိုးကြီးနဲ့ သူ့စိတ်ကျန်းမာရေးအတွက် အဖော်ပြုနေတဲ့ စက်ရုပ်အကြောင်း။

ကဲ ခင်ဗျားတို့ကော ဘယ်စက်ရုပ်တွေကြိုက်သလည်း။ 

Robot and Frank (2013)

MTV တွေ၊ Absolut Vodka တို့ Verizon တို့ အတွက် ကြော်ငြာတွေ ပင်တိုင်ရိုက်ကူးပေးခဲ့တဲ့ Schreier ဟာ သူရဲ့ ပထမဦးဆုံးသော ရုပ်ရှင်အဖြစ် Robot and Frank ကို ရိုက်ကူးတင်ဆက်လိုက်ပါပြီ။ ဒီရုပ်ရှင်ကို ဘတ်ဂျက် ဒေါ်လာ၂.၅ သန််း သာအသုံးပြုပြီး ရက်နှစ်ဆယ်အတွင်းရိုက်ကူးခဲ့တာပါ။


ဇာတ်လမ်းကတော့ အငြိမ်းစားယူထားတဲ့ ပရော်ဖက်ရှင်နယ်သူခိုးကြီးတစ်ယောက်နဲ့ စက်ရုပ်တစ်ရုပ်အကြားက သူငယ်ချင်းဆိုတဲ့ ဆက်ဆံရေးအကြောင်းပါ။ သူခိုးဟောင်းကြီးနာမည်က ဖရန့်။ သူက နယူးယောက် upstate မှာ တစ်ယောက်ထဲ အထီးကျန်နေထိုင်နေပြီး တဖြည်းဖြည်းယိုယွင်းပျက်စီးလာတဲ့ မှတ်ဉာဏ်နဲ့အတူ သူငယ်ပြန်စပြုနေတဲ့ အဖိုးကြီးဖြစ်တယ်။


သူ့သား ဟံသာဟာ သူ့မိသားစုဘဝ၊ သူ့အလုပ်နဲ့သူရှုပ်နေပေတဲ့ တစ်ကိုယ်တည်းအဖေကြီးကို တစ်ပါတ်တစ်ခါလာတွေ့လေ့ရှိတယ်။ သူ့အဖေကို အမြဲမပြတ် သူကိုယ်တိုင်စောင့်ရှောက်ချင်ပေမယ့် မစောင့်ရှောက်နိုင်တဲ့အတွက် ဟံသာဟာ သူ့အဖေအတွက် နေ့စဉ်ပုံမှန် လုပ်ငန်းဆောင်တာကို ချမှတ်ပေးနိုင်တဲ့၊ သူ့အဖေရဲ့ ကျန်းမာရေးတိုးတက်ကောင်းမွန်လာအောင် ပြုစုစောင့်ရှောက်ပေးဖို့အတွက် ပရိုဂရမ်ရေးဆွဲထားတဲ့ အဖော်မွန်စက်ရုပ်တစ်ရုပ်ကို ၀ယ်ပြီးလက်ဆောင်ပေးလိုက်တယ်။

ဒါပေတဲ့ အဲ့ဒီစက်ရုပ်မှာ ဥပဒေအရ တရားဝင်ခြင်းမဝင်ခြင်း၊ အပြစ်ဖြစ်ခြင်းမဖြစ်ခြင်းစသ၍ ဥပေဒေနဲ့ ပတ်သက်သမျှ ပရိုဂရမ်ထည့်သွင်းထားခြင်းမရှိတာကို ဖရန့်သတိထားမိသွားတဲ့အချိန်မှာတော့ ဖရန့်ဟာ သူ့အဖော်စက်ရုပ်ကို သူ့ရဲ့ ၀ါသနာဗီဇအာသီသဖြစ်တဲ့ ဖောက်ထွင်းခိုးယူခြင်းမှာ ပါတနာအဖြစ်အသုံးချနိုင်ဖို့ သင်ကြားလေ့ကျင့်ပေးတော့တယ်။

သူတို့ဒေသမှာ ပုံနှိပ်မီဒီယာကို တဖြည်းဖြည်းချင်းစွန့်ပယ်လာရာကနေ နိုးထတက်ကြွလာတဲ့ ခေတ်လူငယ်တွေက စာကြည့်တိုက်ကြီးကို Community Center ကြီးအဖြစ် အသွင်ပြောင်းဖို့ ကြိုးစားနေကြတုန်းမှာပဲ အဲ့ဒီစာကြည့်တိုက်ကို ပုံမှန်လာလေ့ရှိတဲ့ ဖရန့်က စာကြည့်တိုက်မှုုးအတွက် ဒွန်ကီဟိုးတေးဝတ္တုပထမဆုံးထုတ်စာအုပ်တွေထဲက ကော်ပီတစ်အုပ်ကို စက်ရုပ်နဲ့ပေါင်းပြီး ခိုးတယ်။

ဖရန့်ရဲ့သမီး မက်ဒီဆင်ဟာ စက်ရုပ်ဆန့်ကျင်ရေးပရဟိတလုပ်ငန်းတွေအတွက် တာ့ခ်မင်နစ္စတန်ကို ခရီးထွက်နေရာကနေ ဖရန့်နဲ့စက်ရုပ်အကြောင်းကို ကြားတာနဲ့ သူ့အဖေဆီကို အမြန်ပြန်လာခဲ့တယ်။ ဖရန့်က စက်ရုပ်ရဲ့ရှိနေမှုအတွက် အနှောင့်အယှက်မဖြစ်တော့တဲ့အပြင် စက်ရုပ်နဲ့နေသားကျနေပြီ။ ဖရန့်နဲ့စက်ရုပ်ဟာ နောက်ဆုံးခိုးခြင်းအနေနဲ့ စာကြည့်တိုက်ပြုပြင်ပြောင်းလည်းရေးကို ဦးဆောင်လုပ်ကိုင်နေတဲ့ ဂျိတ်ဆီကနေ အဖိုးတန်ကျောက်မျက်ရတနာတွေ ခိုးယူမလို့ပြင်ဆင်နေကြတယ်။ ရဲတွေပါ ဒီရတနာပျောက်မှုမှာ ပါ၀င်လာတဲ့အခါမှာတော့ ဖရန့်ဟာ တစ်ခုတည်းကျန်ရှိတဲ့ သက်သေအထောက်အထားဖြစ်တဲ့ စက်ရုပ်ရဲ့ မှတ်ဉာဏ်ကို ဖြတ်ပစ်မှဘဲ အမှုကလွတ်နိုင်တော့မှာဖြစ်တယ်။


ဖရန့် စာကြည့်တိုက်ကို ပြန်ရောက်သွားချိန်မှာတော့ စာကြည့်တိုက်မုှုးဟာ သူနဲ့ ကွာရှင်းခဲ့တဲ့ သူ့ချစ်မိန်းမဟောင်းဖြစ်နေတာကို သူပြန်သတိရသွားတယ်။ သူဟာ အတိတ်မေ့နေခဲ့တာ။ သူအိမ်ကိုပြန်လာတဲ့အချိန်မှာတော့ စက်ရုပ်က သူဟာ ငါသူတစ်ပါးယောက်ျားမိန်းမပုဂ္ဂိုလ်မဟုတ်။ သူရဲ့တည်ရှိနေရခြင်း အကြောင်းကလည်း ဖရန့်ကို ကူညီပေးရန်သာဖြစ်ကြောင်းဖြောင်းဖျပြီး သူ့ဟိုလိုဂရပ်ဖစ်မှတ်ဉာဏ်ကို ဖျက်ဆီးပစ်ဖို့ ဖရန့်ကို တိုက်တွန်းတယ်။

ပျောက်ဆုံးသွားတဲ့ ရတနာတွေကို ဘယ်မှာမှ ရှာဖွေမတွေ့ရှိခဲ့ပါဘူး။ ဖရန့် သူ့ရဲ့ စိတ်ရောဂါကို ကုစားဖို့အတွက် စိတ်ကျန်းမာရေးဆေးရုံကို ပို့လိုက်ပါတယ်။ စက်ရုပ်ကလေးပျိုးထောင်ခဲ့တဲ့ ခရမ်းချဉ်သီးပင်တွေရဲ့ အောက်မှာတော့…………………………..။  ။


ပထမဆုံးရိုက်ကူးတဲ့ ရုပ်ရှင်မှာဘဲ သူ့အတတ်ပညာ၊ သူ့အနုပညာကို ပြသနိုင်ခဲ့တဲ့အတွက် Schreier ဟာ ချီးကျူးခြင်းတော်တော်ခံလိုက်ရပါတယ်။ ဒီလိုဘဲ ဖရန့်နေရာမှာသရုပ်ဆောင်တဲ့ မင်းသားကြီး Frank Langella ဟာလည်း သူ့ရဲ့ပြောင်မြောက်လှတဲ့ သရုပ်ဆောင်မှုတွေကြောင့် ခြောက်ပစ်သဲလှဲကင်းစင်တဲ့  အနုသရုပ်ဆောင်အဖြစ် သမုတ်ခံလိုက်ရပါပြီ။ ၂၀၁၂ မှာကတည်းက ထွက်တာဆိုပေတဲ့ Official Release အရ ၂၀၁၃ ထဲစာရင်းဝင်သွားတဲ့ ဒီဇာတ်ကားဟာ လောလောဆယ်မှာတော့ ၂၀၁၂ Sundance ရုပ်ရှင်ပွဲတော်ကြီးမှာ Alfred.P.Solan ဆုကို ဆွတ်ခူးရရှိခဲ့ပြီးဖြစ်ပါတယ်။

Ki Ki's Delivery (1989)

ကာရိကီယက မြို့လေးရဲ့ မြက်ခင်းပြင်ပေါ်မှာ ဆယ်သုံးနှစ်သမီး ကိကီဟာ မိုးလေဝသသတင်းကို ရေဒီယိုကနေ နားဆင်နေတယ်။ ရေဒီယိုကရာသီဥတု သာယာမယ်ဆိုတဲ့ ကြေငြာချက်ကိုလည်း ကြားရော ကိကီလေးဟာ တစ်စုံတစ်ခုကို ဆုံးဖြတ်လိုက်ပုံနဲ့ သူ့အိမ်ဘက်ဆီ သုတ်ခြေတင်ပြေးတော့တယ်။ အိမ်မှာက ဒိုရာဆိုတဲ့အဖွားကြီးက ကိကီလေးအမေဆီ ဆေးလာတောင်းနေတယ်။ ကိကီလေးအမေက ဓါတ်တွေဆေးတွေဘက်မှာ အထူးကျွမ်းကျင်တဲ့ စုန်းမတဲ့။ ကိကီကအိမ်တောင်မရောက်သေးဘူး။ နောက်လအထိသူ့မစောင့်နိုင်တော့ပဲ ဒီနေ့ညနေတင် သူမခရီးထွက်တော့မယ်ဆိုတာကို အော်ပြီးပြေးလာတာ။ အိမ်ကိုရောက်တော့ အိမ်ပေါ်ကို ကပြာကယာပြေးတက်ပြီး ခရီးထွက်ဖို့ ပြင်ဆင်တော့တယ်။


ကိကီလေးအမေ ကိုကီရီဆယ်သုံးနှစ်သမီးဘဝက ကာရိကီယကို စရောက်လာတာကို အမှတ်ရသေးတယ်လို့ အဖွားကြီးဒိုရာက တသပြောနေသေးတယ်။ စုန်းမျိုးဆက်ကလေးတစ်ယောက်ဟာ အသက်ဆယ့်သုံးနှစ်ပြည့်ပြီဆိုတာနဲ့ တခြားမြို့သစ်တစ်ခုခုကို သွားပြီး တစ်နှစ်တိတိလေ့လာသင်ယူရတယ်ဆိုတာ အလေ့အထဖြစ်ပေမယ့် ကိုကီရီက သူ့သမီးကို စိတ်မချဖြစ်နေတယ်။


ကိုကီရီက ကိကီလေးကို ကူညီသိမ်းဆည်းပေးနေတုန်း ကိကီက သူဝတ်ရမယ့် အင်္ကျ ီအနက်ကြီးကို မကြိုက်ကြောင်းပြောတယ်။ သူ့အကြိုက်ဆုံးအရောင်က ခရမ်းရောင်လေ။ ဒါပေမယ့် ကိုကီရီက စုန်းတိုင်းစုန်းတိုင်းဟာ ဒီအကျင်္ ီပုံစံပဲ ၀တ်ဆင်ရတာဖြစ်တယ်လို့ရှင်းပြတယ်။ အပြင်အဆင်အဝတ်အစားက အရေးမကြီးဘူး။ အတွင်းစိတ်နှလုံးသားကသာအရေးကြီးတယ်လို့ ကိကီကို ဆုံးမတယ်။


သာယာတဲ့ လပြည့်ည ညချမ်းချိန်ခါမှာပဲ အိမ်နီးနားချင်းတွေဟာ ကိကီလေးကို နှုတ်ဆက်ဖို့ ရောက်လာကြတယ်။ ကိကီဟာ သူ့အဖေရဲ့ ရေဒီယိုကို သူ့အမေရဲ့ တံမြက်စည်းပျံမှာချိတ်၊ သူ့အချစ်ဆုံးသူငယ်ချင်း ကြောင်ကလေးဂျီဂျီကို သယ်ပြီး ကာရီကီယကနေ စတင်ခရီးထွက်ခွာပါတော့တယ်။


အခက်အခဲလေးတစ်ချို့ ရင်ဆိုင်ပြီး နောက်တစ်နေ့မနက်မှာတော့ ပင်လယ်ကြီးနားက သာယာလှပတဲ့မြို့လေးတစ်မြို့ကို သူတို့ရောက်သွားတော့တယ်။ ကိုရီကိုဆိုတဲ့ အဲ့ဒီမြို့လေးမှာက အခြေချနေထိုင်နေတဲ့ စုန်းမမရှိတဲ့အကြောင်း သတင်းကြားရတော့ ကိကီလေးဟာ သူမရဲ့ ပညာသင်တစ်နှစ်တာကို ကိုရီကိုမြို့လေးမှာပဲ ဖြတ်သန်းဖို့ ဆုံးဖြတ်ချက်ချလိုက်တယ်။ ကိကီရဲ့ ကူညီပေးမှုကြောင့် မုန့်ဖိုပိုင်ရှင် အိုဆိုနိုက သူ့မုန့်ဖိုနောက်ဖေးက အိမ်လေးမှာ ကိကီကို နေထိုင်ခွင့်ပေးလိုက်တယ်။

နောက်နေ့မနက်မှာတော့ ကိကီက မုန့်ဖိုမှာ ၀င်ကူတယ်။ သူတစ်နှစ်တာဒီမှာနေထိုင်ဖို့အတွက် မုန့်ဖိုမှာ အိမ်အရောက်ပို့တဲ့ဝန်ဆောင်မှုလေး လုပ်ပါရစေလို့ အိုဆိုနိုကို တောင်းဆိုလိုက်တယ်။ ကိကီရဲ့ မုန့်အိမ်အရောက်ပို့ပေးတဲ့ ၀န်ဆောင်မှုအတွက် အိုဆိုနိုက ကိကီကို တစ်နှစ်စာအခမဲ့နေထိုင်ခွင့်ပေးလိုက်တယ်။


တစ်နေ့၊ မုန့်ပို့ပေးနေရင်းနဲ့ တောထဲမှာ တစ်ယောက်ထဲနေထိုင်တဲ့ အာဆူလာဆိုတဲ့ ပန်းချီဆရာမလေးနဲ့ ကိကီနဲ့ခင်ခဲ့တယ်။


အဲ့ဒီမြို့လေးမှာ ပျံသန်းခြင်းကို ၀ါသနာပါတဲ့ တွမ်ဘိုဆိုတဲ့ ကောင်လေးတစ်ယောက်ရှိတယ်။ သူက တံမြက်စည်းပျံနဲ့ ကိကီလေးကို သဘောကျနေတယ်။


ကိကီလေးတစ်ယောက် မြို့အသစ်မှာ အဆင်မပြေမှုတွေကို ကြံ့ကြံ့ခံနိုင်ပါ့မလား။


တစ်ညနေမှာတော့ ကိကီဟာ သူ့ကြောင်လေး ဂျီဂျီနဲ့ စကားပြောလို့မရတော့မှ သူ့မှာ မှော်အစွမ်းတွေပျောက်နေတာကို သိလိုက်ရတယ်။ ဒါနဲ့ သူတံမြက်စည်းကို ယူပြီး အိမ်အပြင်ပြေးထွက်ကာ ပျံသန်းဖို့ အကြိမ်ကြိမ်ကြိုးစားတယ်။ ဒါပေမယ့် မှော်အစွမ်းတွေပျောက်ဆုံးနေတော့ တံမြက်စည်းက မပျံနိုင်ပဲ နောက်ဆုံးမတော့ ကျိုးတောင်ကျိုးသွားတော့တယ်။

ကိကီလေး တံမြက်စည်းပျံအသစ်လုပ်မလို့ ကြိုးစားနေတုန်းပဲ သူ့ဆီကို အာဆူလာရောက်လာတော့တယ်။ အာဆူလာက ကိကီနဲ့ ဂျီဂျီကို သူနဲ့လိုက်ခဲ့ဖို့ခေါ်တယ်။ ကိကီကလိုက်ဖို့ ဆုံးဖြတ်လိုက်ပေမယ့် သူငယ်ချင်းအသစ်ရနေတဲ့ ဂျီဂျီကတော့ သူတို့နဲ့ မလိုက်ပဲနေခဲ့တယ်။ ကိကီလေးကို အာဆူလာက ပန်းချီဆွဲတယ်ဆိုတာလည်း မှော်အတတ်လိုပဲလို့ရှင်းပြတယ်။ အချိန်တိုင်း ဆွဲသမျှ လှနေမှာမဟုတ်ဘူး။ ပုံဆွဲချင်စိတ်ရှိပါလျက် ဦးနှောက်ကမထွက်တဲ့အခါတွေရှိတယ်တဲ့။ ထူးအိမ်သင်ပြောသလို အကြည်ဓါတ်လေးရှိနေမှ အနုပညာအလုပ်ဖြစ်တာပေါ့။ အကြည်ဓါတ်လေး ကုန်ခမ်းနေတဲ့အခါမှာ ဘာမှ အလုပ်မဖြစ်တော့ဘူး။ အဲ့တော့ အကြည်ဓါတ်ကလေးပြန်ရအောင် စောင့်တန်စောင့်၊ နားတန်နားရတာပေါ့။

ကိကီလေး အရင်လို မှော်အစွမ်းတွေပြန်ရပါ့မလား။ အရင်လိုပဲ တံမြက်စည်းနဲ့ ပျံသန်းနိုင်ဦးမှာလားဆိုတာကိုတော့………

Argo ( 2012 )

Argo ဟာဖြစ်ရပ်မှန်ကိုအခြေခံပြီး ရိုက်ကူးထားတဲ့ဇာတ်ကားပါ။ Ben Affleck ကိုယ်တိုင် ရိုက်ကူး၊ ကိုယ်တိုင်ပါ၀င်သရုပ်ဆောင်ထားပါတယ်။ George Clooney နဲ့ Ben Affleck ပူးပေါင်းထုတ်လုပ်ပါတယ်။

၁၉၇၉ ခုနှစ် နိုဝင်ဘာက အီရန်မှာရှိတဲ့  အမေရိကန်သံရုံးကို အီရန်တက္ကသိုလ်ကျောင်းသားတွေနဲ့ လက်နက်ကိုင်တစ်ချို့ ၀င်စီးတဲ့အဖြစ်ကို အခြေခံထားတာပါ။ သံရုံးဝန်ထမ်း အယောက် ၅၀ ကျော်ကို ဓါးစာခံအဖြစ်ဖမ်းဆီးထားချိန်မှာ သံရုံးဝန်ထမ်းခြောက်ယောက် ထွက်ပြေးလွတ်မြောက်သွားပါတယ်။ သူတို့ကို အဲ့ဒီအချိန်က မဟာမိတ်ဆိုတဲ့ ဗြိတိသျှသံရုံးကလက်မခံပါဘူး။ ရုရှသံရုံးကလည်း လက်မခံပါဘူး။ ကနေဒါသံရုံးကလက်ခံပြီး သံအမတ်ကြီးက သူ့အိမ်မှာ ပုန်းအောင်းခွင့်ပြုလိုက်ပါတယ်။ အဲ့ဒီခြောက်ယောက်ကို ကယ်ထုတ်နိုင်ဖို့ စီအိုင်အေက ကြံစည်ပါတော့တယ်။ စီအိုင်အေရဲ့အကြံကတော့ အေးဂျင့်မန်ဒက်ဇ်ကို အီရန်မှာ ရိုက်မယ့် ရုပ်ရှင်ထုတ်လုပ်သူအဖြစ် အသွင်ယူခိုင်းပြီး ကနေဒါသံအမတ်ကြီးနေအိမ်က ခြောက်ယောက်ကို ရုပ်ရှင်အဖွဲ့သားများအဖြစ် ဟန်ဆောင်က အီရန်ကနေခိုးထုတ်ဖို့ပါပဲ။ အေးဂျင့်မန်ဒက်ဇ်က သူ့မိတ်ဆွေ ဟောလိ၀ုဒ်မိတ်ကပ်ဆရာ ဂျွန်ချိန်ဘာကို အကူအညီတောင်းပြီး ရုပ်ရှင်ကုမ္ပဏီအတုထောင်တယ်။ အီရန်မြေကို အခြေခံပြီး ရိုက်ကူးမယ့် သိပ္ပံစိတ်ကူးယဉ်ဇာတ်ကား Argo ကို ဇာတ်ညွှန်းတွေ၊ ပိုစတာတွေကအစ ယုတ္တိယုတ္တာရှိရှိဖန်တီးလိုက်ပါတယ်။ မန်ဒက်ဇ်ဟာ သံရုံးဝန်ထမ်းခြောက်ယောက်ကို အောင်မြင်အောင် ကယ်ထုတ်နိုင်ပါ့မလား။

ဒီဇာတ်ကားနဲ့ Ben Affleck က သူ့ဒါရိုက်တာပညာအရည်အချင်းကို ပြလိုက်တာပဲ။ ဒါပေမယ့် အော်စကာစကာတင်မှာတော့ ရွေးချယ်ခြင်းမခံခဲ့ရပါဘူး။

The Hobbit: An Unexpected Journey ( 2012 )

Hello LOTR fans!
LOTR မှာ ချစ်တဲ့ Gandalf ကြီးကရုပ်တည်ကြီးနဲ့ စကားတွေအများကြီးပြောတယ်။ ပြီးရင် အင်မတန်မှတ်သားဖွယ်ကောင်းတဲ့အဆိုအမိန့်ပြောတယ်။ ဘာလည်းသိလား။

RUN, you fools!!!!!!!! :P

LOTR ( The Lord of the Rings ) ဇာတ်လမ်းတွဲတွေနဲ့ ကျနော်တို့ အလယ်ခေတ်ကမ္ဘာကြီးဆီ သွားလည်ခဲ့ဖူးကြတာ တော်တော်ကြာပေါ့နော့။ ကဲ ခု The Hobbit: An Unexpected Journey ဆိုတဲ့ ဇာတ်ကားနဲ့ တစ်ချိန်က ကျနော်တို့ရဲ့ စိတ်ကူးယဉ်ကမ္ဘာကြီးဆီပြန်အလည်သွားကြစို့ရဲ့။ ဒီကားက LOTR ဇာတ်ကားစီးရီးတွေကို ထုတ်လုပ်တဲ့သူတွေကပဲ ထုတ်လုပ်တာ။ ဇာတ်လမ်းဇာတ်ညွှန်းဆရာတွေကလည်းတူတူပဲ။ ဟုတ်ကဲ့။ ရိုက်ကူးတဲ့သူကလည်း ကျနော်တို့ ဆရာကြီး Peter Jackson ပါပဲခင်ဗျာ။ Peter Jackson က LOTR စီးရီးနဲ့ တော်တော်အကျိုးပေးကောင်းခဲ့တဲ့သူ။ အကယ်ဒမီတွေလည်း အများကြီးရ။ နာမည်လည်း ကြီးခဲ့တာပေါ့။ LOTR စီးရီးတွေ မကြည့်ခဲ့ဖူးတွေအတွက်လည်း ဒီတစ်ကားထဲကြည့်ယုံနဲ့ နားလည်နိုင်ပါတယ်။ ခုမှ ဒီကားကို စကြည့်မိတဲ့သူတွေအတွက်လည်း LOTR သုံးကားကို ပြန်ရှာကြည့်ချင်စိတ်ပေါက်သွားတာပေါ့ခင်ဗျာ။

The Hobbit: An Unexpected Journey ဇာတ်ကားက LOTR ရဲ့ ပထမဆုံးဇာတ်ကားဖြစ်တဲ့ The Fellowship of the Ring ( 2001 ) ရဲ့ နိဒါန်းလို့ပြောလို့လည်းရတယ်။ “The One Ring” လို့ခေါ်တဲ့ လက်စွပ်အားလုံးကို ထိန်းချုပ်နိုင်တဲ့၊ လက်စွပ်အားလုံးရဲ့ အရှင်သခင်လက်စွပ်ကို ဟော့ဘစ်လေး Bilbo Baggins ဘယ်ကဘယ်လိုရရှိခဲ့တာလည်းဆိုတဲ့ ဇာတ်လမ်းဖြစ်တယ်။ LOTR ထဲမှာ လက်စွပ်ရရှိခဲ့ပုံကို အခန်းငယ်တစ်ဖြတ်အနေနဲ့ ရိုက်ပြထားပါတယ်။ ဒါကတော့ ဇာတ်လမ်းအကျယ်ပေါ့။ Bilbo ရဲ့ စွန့်စားမှုခရီးကြမ်းအကြောင်း။


LOTR မှာလိုပဲ ပြဿနာကို စသယ်လာတဲ့သူကတော့ ကျနော်တို့ အချစ်တော် မှော်ဆရာကြီး Gandalf ပဲ။ ပျက်သုန်းသွားတဲ့ Erebor ဆိုတဲ့ နိုင်ငံတော်နားမှာ ပျောက်ဆုံးနေတဲ့ ရွှေသိုက်တစ်ခုကို ရှာဖွေဖို့  စွန့်စားခန်းဖွင့်မယ့် ခရီးမှာ သူနဲ့အတူတူလိုက်ပါဖို့ Bilbo ကို လာခေါ်တာကိုး။ ဒါပေမယ့် သူတို့ သေချာမသိတာက ရွှေသိုက်ရှိတဲ့ မြို့တော်ဟောင်းကြီးမှာ Smaug ဆိုတဲ့ မီးနဂါးကြီးတစ်ကောင် ပိတ်ကျန်ခဲ့တယ်ဆိုတာပဲ။ သူ့ဟာသူ pipe-weed လေးရှုုလိုက်၊ အစားအသောက်ကောင်းတွေမှာပျော်မွေ့လိုက်၊ စာလေးဘာလေးရေးလိုက်၊ ညဆို ဘီယာလေးသောက်လိုက်နဲ့ သာယာပျော်ရွှင်ဖွယ်ကောင်းနေတဲ့ သူ့ဘဝကိုပစ်ပြီး ဘယ်ကမှန်းမသိတဲ့ ဂျပု ဆယ့်သုံးကောင်ကိုကူပြီး သူတို့ရဲ့ ပျောက်ဆုံးသွားတဲ့ နိုင်ငံတော်ကို ပြန်ရှာဖွေဖို့နဲ့ မသေချာမရေရာတဲ့ ရွှေသိုက်ကိုရှာတဲ့ Gandalf ကို ကူဖို့ Bilbo ဘယ်လိုများ ဆုံးဖြတ်နိုင်ပါ့မလည်း။

ကျနော် ဒီဇာတ်ကားတွေကို ချစ်မြတ်နိုးရခြင်းကတော့ နေချင်စရာကောင်းလှတဲ့ Tolkien ကမ္ဘာတွေကို ဒါရိုက်တာကြီးက ကျနော်တို့ဘဝထဲ ယူလာလို့ပါပဲ။ ပါတီတွေပေး၊ သောက်စားပျော်ပါးနေတဲ့ Shire ဆိုတဲ့ Hobbit တွေရဲ့ အရပ်လေးမှာ သွားနေဆို ကျနော်ကတော့ မငြင်းပါဘူး။ ဒီလောက် သာယာလှပ၊ နေချင့်စဖွယ်၊ ပျော်စရာကောင်းတဲ့ အရပ်ကိုး။ တစ်ခုတော့ ရှိတယ်။ Hobbit တွေရဲ့ အိမ်ထဲဝင်ရင် ခေါင်းကို တစ်ခုခုနဲ့ မတိုက်မိအောင် သတိထားရမယ်။ Hobbit တွေရဲ့ အိမ်ထဲမှာ ဇိမ်ခံစရာပစ္စည်းပေါင်းစုံရှိတယ်။ အစားကောင်းအသောက်ကောင်းတွေ သိုလှောင်ထားတဲ့ စတိုရှိတယ်။ ကမ္ဘာ့အကောင်းဆုံး weed တွေရှိတယ်။ Hobbit တွေဟာ ဘဝကို အင်မတန် ပျော်ရွှင်ချမ်းမြေ့စွာနဲ့ ဖြတ်သန်းကြသူတွေဖြစ်တယ်။ အချိန်တိုင်း ပျော်ရွှင်နေတတ်သူတွေဖြစ်တယ်။ သူငယ်ချင်းတွေနဲ့ ပါတီတွေလုပ်မယ်၊ အစားကောင်းအသောက်ကောင်းတွေဝေမျှမယ်၊ သီချင်းကဗျာတွေ သီကျွေးကခုန်ကြမယ်။နေပါဦး ကျနော်မေးကြည့်ပါရစေ။ ဘဝမှာ ဘာလို့ အပျော်တွေချည်းပဲ မရှိရမှာလည်း။ ဘဝမှာ အပျော်တွေချည်းပဲရှိလို့မရဘူးလား။

ဟုတ်ကဲ့။ အဲ့သလို နေချင့်စဖွယ် ပျော်စဖွယ် သာယာလှပတဲ့ Shire အရပ်ရဲ့ ပတ်ပတ်လည်မှာတော့ ငြိမ်းချမ်းပျော်ရွှင်မှုတွေကို နှောင့်ယှက်ဖျက်ဆီးတတ်တဲ့ ဘီလူးတွေ၊ မှင်စာတွေ၊ အမှောင်အင်အားစုတွေရှိလို့နေပါတယ်။ ဒါဟာ ရုပ်ရှင်ဖန်တီးသူများ ပေးချင်တဲ့ အဓိက Message ဖြစ်မယ်ထင်ပါတယ်။ Bilbo ဟာ သူ့သက်သာဇုံလေးကနေ ချိုးဖောက်ထွက်ပြီး အပြင်က ကမ္ဘာလောကထဲကို ဘာကြောင့်ထွက်ခဲ့ရတာလည်း။ သူဟာ တခြားသူတွေလို ခုခံတွန်းလှန်တတ်တဲ့ Hero လည်းမဟုတ်ပဲနဲ့။ ဒါပေမယ့် သူက သူများတွေ ဘာလည်းဆိုတာ တွေးတဲ့သူမျိုးမဟုတ်ဘူး။ သူဟာ သူများတွေရဲ့ ဒုက္ခသုက္ခကို မျှဝေခံစားဖို့ သင်ယူနိုင်ပါ့မလား။ ဒါဟာ လူတွေသူတို့ရဲ့ သက်သာဇုံထဲကနေ၊ သူတို့ရဲ့ သက်တောင့်သက်သာဖြစ်နေတဲ့ဘဝကနေ မဖြစ်မနေ ချိုးဖောက်ထွက်ရတဲ့အခါတိုင်း တွေးလေ့တွေးထရှိတဲ့ အိုင်ဒီယိုလိုဂျီအဟောင်းကြီးပါ။


ဒီဇာတ်ကားကို ကြည့်ရတာတန်တယ်လို့ ကျနော်ထင်မိစေတာက ဇာတ်ကောင်တွေရဲ့ စရိုက်တွေနဲ့ သူတို့ မှီတင်းနေထိုင်တဲ့ ကမ္ဘာလောကကြီးကြောင့်ပါပဲ။ လူပု ၁၃ ယောက်ရဲ့ ဟာသဉာဏ်၊ အစားအပေါ်လောဘနဲ့ သူတို့ရဲ့ သီချင်းသံတွေက ကျနော့်အတွက်တော့ ချစ်စရာအတော်ကောင်းနေတယ်။ ဒါနဲ့ အွန်လိုင်းမှာကော၊ စာကြည့်တိုက်တွေမှာပါ Tolkien စာအုပ်တွေရှာဖတ်ကြည့်မိစေပါတယ်။ စကားမစပ်ပြောရရင် ထူးဆန်းတဲ့ နယ်မြေကို ဖြတ်သန်းပြီးသွားရတဲ့ ခရီးလမ်းမှာ ကျနော်တို့မမျှော်လင့်ဘဲတွေ့ဆုံဖို့ မျှော်လင့်ထားတဲ့ ထူးဆန်းတဲ့ သတ္တဝါကြီးတွေဟာလည်း fantasy film တွေကို ကျနော်ကြိုက်ရတဲ့အကြောင်းဖြစ်တယ်။ ဒါပေမယ့် စာအုပ်တွေဖတ်ကြည့်ပြီး ခံစားမိတာလေးပြောရဦးမယ်။

Harry Potter စာအုပ်တွေကို အသည်းအသန်ဖတ်ပြီး ရုပ်ရှင်လည်းထွက်လာရော ဆဲတောင်ဆဲမိတယ်။ ရုပ်ရှင်ဆိုတာကလည်း သူ့ပညာနဲ့သူဆိုတော့ စာအုပ်အတိုင်းလိုက်ရိုက်လို့မှလည်း မဖြစ်တာကိုး။ တချို့ စိတ်ကူးယဉ်ဇာတ်ကွက်တွေချဲ့ထွင်ရတယ်။ တစ်ချို့ ဇာတ်ကွက်တွေကို ဖြုတ်တန်ဖြုတ်ရတယ်။ အဲ့ခါ စာအုပ်ဖတ်မိတဲ့ ကျနော့်ကို ကျနော်ပဲ စာအုပ်နဲ့ ရုပ်ရှင်ကို အမြဲလိုက်ယှဉ်ကြည့်မိတဲ့ မျက်လုံးတွေကိုပဲ အပြစ်တင်ရတော့တယ်။ ရုပ်ရှင်သမားတွေဟာ ဇာတ်ကွက်တစ်ကွက်နဲ့ တစ်ကွက်ကို ချိန်းတွေလုပ်ရတယ်။ နောက် ဇာတ်ကားတစ်ကားဆက်ရိုက်ဖို့ မျှော်မှန်းထားတဲ့ ရုပ်ရှင်တွေမှာဆို အဲ့သလို ချိန်းဖို့ ဇာတ်ကွက်တွေ ကြိုဆင်ထားရတယ်။ ခင်ဗျားတို့ကို ၀မ်းသာစရာသတင်းကြိုပေးရမယ်ဆိုရင် The Hobbit: The Desolation of Smug ဆိုတဲ့ ကားကို ရိုက်ပြီးနေပြီ။ သူတို့ဆီမှာ ၂၀၁၃ နွေဆိုရင် စ ရုံတင်တော့မယ်။ နောက် The Hobbit: There and Back Again ဆိုတာကလည်း သိပ်မကြာခင်ကာလမှာပဲ ဆက်ထွက်လာတော့မယ်။ ဒါကြောင့် An Unexpected Journey ကားမှာ လာမယ့်ကားတွေအတွက် အကြို ဆင်ထားတဲ့ ဇာတ်ကွက်တွေ၊ ဇာတ်ဝင်စကားတွေ ခင်ဗျားတို့ ကြားရလိမ့်မယ်။ ကြည့်ရလိမ့်မယ်။ တစ်ချို့ ဇာတ်ကောင်တွေကို ကြိုမိတ်ဆက်ထားတယ်။ LOTR ပရိတ်သတ်တွေအတွက် Bilbo ရဲ့ Riddle တွေဖြေရှင်းပုံတွေပါတယ်။ LOTR ပရိတ်သတ်အမှန်ဆိုရင်တော့ ဒီကားက ခင်ဗျားတို့ကို စိတ်ပျက်စေမှာမဟုတ်ဘူး။ ကျနော့်လိုပဲ ချစ်လိမ့်မယ်။ :P


LOTR ဇာတ်ကားတွေမှာ သရုပ်ဆောင်အကောင်းဆုံးဖြစ်တဲ့၊ လူတိုင်းချစ်တဲ့ Gollum ကလည်း အံ့မခန်းသရုပ်ဆောင်ပြလိမ့်မယ်။ :P